DESCRIPTION DÉTAILLÉE :

Esprit Astoin et Henri Martin, maçon et charpentier de Pertuis, sont sollicités pour réparer la toiture du chœur de l'église Saint-Nicolas de Pertuis (Archives départementales du Vaucluse, 3E55/293, f°1160 v°-1162 v°, f°1216-1218) :

"Pris faict pour le sieur abbé de Montmajour contre Esperit Astoin et Henrrigon Martin

L'an sus dit... M. Allexandre Arnaud, bailhe abatial de ceste ville de Pertuis... pour et au nom de monseigneur l'abbé de Montmajour... a bailhé et bailhe a pris faict à Esperit Astoin, mestre masson, et Henry Martin, mestre charpantier, dudit Pertuis, presentz et estipullantz, aux fins de couvrir bien et deubement le perpectery de l'eglize Sainct Nicollas du dit Pertuis et recoullar bien et deubement tout le couvert de ladite esglize et y metre de thuiles à suffizance affin que n'y puisse rien pluvoyr dedans et audit perpectery fournir et metre trois bonnes fustes sive redons de sap, lesquelles auront ung pan d'ueilh au petit bout, pour couvrir le couvert dudit perpectery et y metre de quers en icelluy perpectery se que y sera de besoing. Laquelle besongne lesdits mestres preffachiers hont proumis et proumectent fere et parfaire bien et deubement à leurs propres coustz et despans et seront teneus fournir lesdites fustes et tout autre attraict que sera requis et necessaire tant chaulx, sable, clavezon que thuilles. Et sy est de besoing de metre de quers audit perpectery, lesdits mestres en feront fere à leurs despans des fustes vieilhes que y sont et donneront bonne et suffizante pente audit perpectery. Et sy aux autres endroictz de ladite esglize y deffault de bois ledit sieur bailhe au dit nom sera tenu le fournir. A laquelle oeuvre seront tenus travailher et y metre la main dans huict jours prochains et y metront lesdites fustes lhorsque en pourront recouvrer et en treuver long de la riviere de Durance ou ailheurs.

Et pour toute laquelle oeuvre et pris faict ledit sieur bailhe a proumis et proumect ausdits mestres Astoin et Henry Martin de leur fere paier et expedier au dit sieur de Montmajour ou à ses rantiers dudit Pertuis la soume de quarante escuz d'or sol à soixante soulz piesse et ce à la première requeste et demande..."

[A la suite : ] Le 7 décembre 1599, quittance donnée par les prifachiers à capitaine Heiriey Roy, capitaine Phellip de Venasque et damoyselle Ysabeau, veuve de Simon de Sainct Martin, fermiers de la taxe de ceste ville, de la somme de 40 écus..

Le 17 décembre suivant, Henri Martin et Esprit Astoin annulent le prix-fait et remboursent les 40 écus, "n'ayant lesdits mestres preffachiers moyen de pouvoyr recouvrer les fustes de sap qu'estoyent chargés de fournir et metre audit presbitere pour s'en pouvoyr sy tost treuver".

Archives départementales du Vaucluse, 3E55/300, f° 1233v°-1235.

" Pris faict pour le sieur Jehan Baptiste de Rippa contre George Bernard, mestre menuzier

L'an sus dit... Le sieur Jehan Baptiste de Rippa, de la ville de Marseilhe, fermier general du doumeine de Mondmajeur et par se moyen du prioré de ceste ville de Pertuis, d'une part et George Bernard, mestre menuzier de la ville d'Apt, d'autre... suivant la constrainte faicte audit fermier à la requeste du procureur fiscal aux reparations de l'esglize parrochiale Sainct Nicollas dudit Pertuis d'autre... suivant la constrainte faicte audit fermier à la requeste du procureur fiscal aux réparations de l'esglize parrochialle Sainct Nicollas dudit pertuis suivant la constrainte et ordonnance du sieur d'Aix, hont faict prys faict, paiche et convention comme s'ensuit :

Savoyr que le dit Bernard sera tenu comme il promet faire et parfaire bien et deubement à ses propres cousts et despans une grand porte à celle de ladicte esglize sainct Nicollas, laquelle fera de bon et beau nouier issuit et bien condissioné, bien et suffizement doublée de boys de sap issuit, laquelle porte fera de la mesme fasson et enrichissements qu'est le dessain et portraict sy presantement faict et dressé sur ung papaier, duquel messiers les conseulx jehan Dourgon, escuier sieur de Puimicheau, et sire Claude Bernard deux d'iceulx sy presans, en hont retiré une moityé, où est depainct la Foy au dessus et au plus ault de ladicte porte, et l'autre retirée par ledict mestre menuzier, où est depainct la Charité, avec les fassons et molleures depainctes, le tout bien et deubement proportionné. Et sur le millieu y fera la petite porte s'ouvrant tout d'un cousté de six pans de largeur et dix pans d'aulteur, avec ung grand cadre et paneau au milieu de tailhe et au dessus les cournisses et courrones et autres fassons suivant ledict dessain. Laquelle sera tenu avoyr bien et deubement faicte et parachevée et pozée dans ung moys et demy d'huy contable à peine de tous despans et intherés, moyennant le prys et some de cent vingt six livres payables par ceste fasson : c'est quarante huict livres tout presantement... Et le surplus la moityé lhorsque de l'euvre sera faicte et l'autre moityé et parfaict payement incontinant que sera parachevée..."

[A la suite : ] le 25 juin 1607, nouveau prix fait conclu entre le même fermier général et Antoine Jaumard et jean Chautras, maistres menuisiers de Bonnieux et de Pertuis, de "faire, parfaire et parachever bien et deubement la porte de l'églize sainct Nicollas dudict Pertuis de bon et beau nouier et bien condissionné avec les fassons, enrechissemens, quallités et ornements pourtés et comme est expeciffyé au susdict acte, duquel en sont bien et deubement informés et se entre icy et le jour et feste de Sainct Michel prochain... Et se pour le prys et soume de quarante troys escus faisant cent vingt neuf livres..."

Archives départementales du Vaucluse, 3E55/279, f°35 v°-38 v°.

"Fondation de messes pour messire Balthelemi Thomassin religieux en l'esglize perrochiale de Saint-Nicolas de Pertuis

... Messire Barthelemy Thomassin, relligieux de l'ordre de Saint Benoict de l'esglise Saint Pierre de Montmajour les Arles, bachelier es droits, prieur du prioré Nostre Dame de Salle d'Eiguin terroir de ceste de Pertuis, ung des quatre relligieux servants l'esglise perrochialle Sainct Nicolas de ladite ville, fils de M. maistre jehan André Thomassin, vivant seigneur d'Aynaq et consseilher du Roy en sa court de parlement de ce pais de Provensse... A fondé à l'honneur de Dieu et pour l'aumantement deu servisse divin en l'esglise perrochile saint Nicollas de ceste ville de Pertuis, présents, aceptants, estipullant pour le proffit et utilité de ladite esglise assavoir messires reimond palmier, Barthelemi Vernet et Anthoine Castagnier, religieux Saint benoit de ladite esglise de Saint Pierre de Montmajour les Arlles demurants à la dite esglise et messires jehan Girard , prebstre et viquaire perpétuel de ladite eglie de saint Nicollas messires Gregoire Chapuis, Jehan Romete, Helzias Boffi, Jaques Arnaud, Louis Angles, jaques André Blaquier et jaques Castan, tous prebstres seculiers agrégés à ladite esglise et au servisse d'icelle à savoir est :

une petite messe du Saint Experit, anuellement et perpétuellement dire et sellebrer tous les jours du judy incontinant après que la messe de primo sera dite acomanssant à se dire et sellebrer tout incontinant que la secrestie sive chapelle sy après escripte sera, Dieu aydant, construite et bastie et se dira et sellebrera dans icelle sacrestie. Et après le dexces et trepas dudit messire thomassin au lieu et plasse de la susdite messe de Saint Exprit veult le dit messire Thommassin que soit sellebré une petite messe de mortuis tous les jours du judy perpetuellement come dit est.

Plus a fondé et fonde à ladite esglise une grande messe a noto, à diacre, soubsdiacre, de Nostre Dame, à dire et cellebrer anuellement et perpetuelement une fois chescung mois et au premier jour du mois avec une soulte après icelle messe dans icelle secrestie sive chapelle, laquelle grand messe acomanssera de se dire et selebrer tout incontinant que la dite secrestie sera parachevée, et tost après que la messe de primo sera dite. Et après le dexcès dudit messire Thomassin, il veult et antand que au lieu de ladite grand messe de Nostre Dame soit dit et selebré une grand messe de mortuis à note, diacrre, soubsdiacre, une fois chescung mois de l'an perpetuellement et ung mesme jour que le dit messire Thomassin dessedera, avec vespres et ung notur et laudes de mortuis à basse voix sur la sepuiture dudit messire Thomassin de toute l'affection fraternele qu'il se peult desirer tous lesdits messires les religieux et prebstres et autres qui diront la messe à ladite esglise, au sortir de la selebration de leur messe, de dire sy leur plaict un requiescant in passe pour luy et sur sa tunbe, qu'est la tunbe generale de tous les religieux et prebstres de ladite esglise. Et pour la dotation de la fondation desdites messes et vespres, ledit messire Barthelemi Thomassin a promis et promet... de fere faire construire et bastir une secrestie sive chapelle à ladite esglise de Saint Nicolas et au bout d'icelle joignant le presbitere du cousté du simantiere, de la largeur de trois cannes au carré franq, crotée à crosilhon et bien couverte à thuyle noyé, avec son authiel et retable, avec sa fenestre vitrée trelissée, ung aiguier, armoire, porte, serrure et clef, et pavée comme sera advisé par luy, en some que sera fornit par le dit messire THomassin jusques à la some de trois cens livres, et ce dans six mois prochains comtables dès ce jour d'huy..."

Archives départementales du Vaucluse, 3E55/279, f° 39-41.

"Pris faict pour messire Barthelemi Thomassin contre Pascal et Claude Rollands cousins du lieu de Cucuron,

... Messire Barthelemi Thomassin... a bailhé et bailhe par le present instrument à pris faict sive à fere à Pascal et Claude Rolands, cousins germains deu lieu de Cucuron,... à savoir est de fere une secrestie sive chapelle à l'esglise de saint-Nicolas de ceste ville de Pertuis et au bout d'icelle deu cousté du simantiere joingnant ledit perpeteri de ladite esglise, de trois canes au carré de franq dans hevre, crotade à crosilhon, de massonarie, avec une fenestre de deux pans de largeur et quatre pans d'auteur, ung authiel, deux armoires, ung eiguier, le tout au lieux plus comodes ; paver ladite secrestie de bards s'y s'en treuve ou bien la caladar et icelle abrever de mortier ; fere dans la dite secrestie une petite tunbe et au milieu dudit bastimant ; couvrir la dite secrestie, le tout aux despans desdits Rolands, fors et excepté que ledit messire Thomassin sera teneu de luy bailher piarres et tuilles nessesseres pour ladite besongne. La piarre lesdits maistres Rolands la prandront de celle de la ruine deu chasteau près de ladite esglise que apertient audit messire Thomassin come il dit et les tuilles ledit messire Thomassin les fera porter sur la plasse à ses despans. Les murailhes seront de trois pans et demy d'epesseur.

Item que lesdits maistres Rolands leveront la terre et ruine que se treuvera dans ladite plasse à ses despans et la geter le long du simantiere.

Item que la crotte sera de l'auteur de huit pans d'auteur dessus le pavé.

Item que sera le pavé au niveau deu pavé de la porte de ladite secrestie qu'est fete à cest androict.

Item que ouvriront ladite porte de ladite secrestie qu'est à présent bastie.

item que feront une porte pour la dite secrestie toute planouze auprès de l'authel de saint Crespin pour y antrer de la petite nau et du cousté dudit buis là où sera advisé par lesdites parties.

Et lequel pris faict a faict ausdits mestres massons pour le pris et some de cent septante quatre livres, en destruction desquelles lesdits Rolands ont confessé et confessent avoir receu dudit messire Thomassin soixante livres... Et le reste s'est soixante livres lorsque la moitié de la dite besongne...

Item que les dits mestres massons seront teneus d'avoir faict et parachevé ladite besongne dans cinq mois prochains advenir à compter dès ce jour...

[Témoins :] messire Jehan des Horgues, prebstre, messire Pierre Dorgon relligieux de Saint-Pierre de Montmajour"