Pris faict pour la luminere Saint Anthoine contre Michel Chabert et Poncet Colomp

Du treziesme jour de ce mois d'avril appres midi... Gregoire Chauvet, Jehan Massot et Jehan Auquier, mestres parandoriers, prieurs de la luminere Saint Anthoine de ceste ville de Pertuis, ... ont bailhé à pris fait à Michel Chabert et Poncet Colomp, mestres massons de ladicte ville presentz stipulantz savoir est de fere , bastir et parfere bien et deubement entre icy et la Saint Michel prochain venant une esglise sive chapelle soubz le tiltre Saint Anthoine au dehors de la ville, au chemin alant à la Tour d'Aigues, proche de la terre de sire Jaques Blanc que souloit estre de M. Dealbis, et ce de la grandeur et longur que sera de besong et advisé par lesdictz prieurs, avec le perpeteri crotat avec l'arcade de taille, ensenble les deux portes, savoir la grande au devant ladicte esglise et la petite porte aussi en arcade de taille toutes planes, de la grandeur et authur que sera advisé, avec les coings dutict bastimant de taille ou massonarie comme sera advisé par lesdictz prieurs et ce chaux et sable. Quant au reste des murailles ce bastiront de terre et lesdictz prieurs fourniront tout excepté l'eau et ce sur le lieu et ce lesdictes murailles de l'espesseur de deux pans et le fondemant de deux pans et quart, et ce ladicte besongne pour le pris de trante soulz la cane carrade tant plain que vuide, payable quatre escutz tout maintenant... et le reste en travalhant à la besongne à proportion d'icelle ...

Acte cancellé le 16 février 1602.

A.D. Vaucluse, E Notaires, Etude Enjoubert de Pertuis, n° 696, f° 192 v° -193 v°.