Pris faict pour mestre Antho ine Bonaud contre Estienne Chauvet mestre masson

Du onziesme jour de ce mois de janvier mil six centz trois advant midy, establis en leurs personnes par devant moy notere et tesmoings mestres Anthoine Bonaud et André Jehan, noteres royaulx de ceste ville de Pertuis, lesquelz de leurs grés ont bailhé à pris faict à Estienne et Claude Chauvet, pere et filz, mestres massons dud. Pertuis, presantz stipulantz l'ung pour l'autre...,scavoir est :

ET en premier lieu led. mestre André Jehan en son particullier de bastir, fere et parfaire bien et deubemant tout le devant et carage des deux chambres, d'hault en bas et de bas en hault despuis la rue jusques à la thaullisse, consistant à tout le devant de la maison que feust de mestre Pascallis et Jehan Bonaud, à prandre despuis la maison paternelle dud. Jehan jusques à la maison de mestre Anthoine Bonaud notere et au millieu du jour du passage de la cour comune apellée des Rouses et de la mesme hauteur de lad. maison paternelle dud. Jehan. Et sur lequel devant sera bastit de pierre de taille jusques à la segonde coudiere incluse, continuant les deux coudieres de la mesme fasson de celles que sont à lad. maison paternelle, et y fera deux arquades aux deux bouthiques de la mesme fasson des autres bothiques de lad. maison comma aussi deux croixieres et deux demy croixieres et deux fenestres bastardes au plus hault, le tout de taille. Et despuis lad. segonde coudiere en hault de massonerie de l'especeur de lad. taille, cy mieulx ne ce peult ce fera à gip et mourtier, à ce comprins lesd. fenestres, savoir la croixiere, demy croixiere et lesd. fenestres de taille .

Comme aussi dfe bastir les murailles du dernier de la maison que feust dud. Jehan Bonaud alant joindre celle dud. mestre Anthoine Bonaud et celle de la maison que feust dud. Pascallis, et pour fere lad. besongne abatront toutes les murailles vielles et retiendront les murailles que besoing sera ensemble les solliers et poseront les fustes, quertz et cabrions desditz solliers et taullisse que couvriront bien et deubemant. Et ce avec paiche que led.mestre André Jehan fournira tout l'atrait necessaire excepté l'eau.

Item que lesd . Chauvetz sront tenus comme prometent avoir faict et parfaict lad. besongne bien et deubemant entre ycy et la fin du mois de may prochain venant sans contredit. Et par dessus lad. besongne feront ung eyguier à la derniere chanbre et led. mestre André Jehan fournira la pierre et les bourneaux.

Et pour laquelle besongne led. mestre André Jehan sera tenu de payer au sd. mestres massons savoir est pour chascune cane carrade de la taille tant plain que vuide despuis la segonde coudiere en bas six livres et tout le reste de lad. besongne à raison de vingt quatre soulz aussi pour cane carrade, y comprins led. fenestrage de taille que ce faict au dessus la segonde coudiere que sera au mesme pris de la massonnerie, payables savoir vingt escus en escontemant et à bon compte de plus de somme que led. mestre Estienne Chauvetluy doibt pour pris d'une terre et le surplus en travaillant à lad. besongne et à proportion d'icelle.

Et iceulx mestres Bonaud et Jehan en comun de fere une arquade fassonnée comme les autres si dessus de taille à l'antrée dud. passage de lad. cour, avec ses pieds droictz l'ung prenant naissance dans le coing de la maison dud. mestre Bonaud, laquelle sera double, et l'autre pied droit du cousté de la maison dud. mestre André Jehan, et couvrir sive crouta led. passage despuis icelle arquade jusques à la premiere arquade dud. Bonaud et ce de gipparie.

Et neantmoingz de bastir au dessus lesd. arquades et crotte la murailhe mestresse d'entre les maisons desd. mestres Bonaud et Jehan, de la hauteur de la maison dud. Jehan, ensenble la face sive le devant ce que conserne led. mestre Bonaud de massonnerie avec deux demy croixieres aussi de massonnerie avec ses batantz de gip et croixillon, et ce à lad. raison savoir lad. at·quade tant plain que vuide à lad. raison de six livres pour cane et la massonnerie aussi tant plain que vuide aussi à lad? raison de vingt quatre soulz pourcane, payant en faisant lad. besongne chascung sa ratte part et de mesme la fourniture de l'atrait...

A la suite le 9 novembre 1603, cancellation.

A.D. Vaucluse, E Notaires, Etude Barriol de Pertuis n° 335, f° 14 v° - 17 v°.